【心術得正】－ 短炒、中線、長渣，都有人成功，我應該點部署？

標題應該係 “短炒、中線、長渣，都有人成功，點解得我唔得？“。相信呢句說話講出左好多人既心聲。

首先，每個人定期短炒、中線、長渣既定義都唔一樣，為左方便下面既討論，我係度落一個定義先：

長渣：買入股票後預期持貨時間長於一年
中線：買入股票後預期持貨時間至少半個月
短炒：買入股票後預期持貨時間不會長於半個月

長渣既多數價值投資者，成功例子有巴菲特、彼得·林奇和馬克．庫珀等。
中線既多數都係進行對沖交易，判斷同預測未來的走勢，然後押往順勢的一方。索羅斯就係當中的佼佼者。
短炒出名既有李佛摩和馬丁舒華茲等等，以圖表形態或個別消息在短時間內買進並獲利離場。（李佛摩既股票作手回憶錄是我會不斷持續番睇既作品，當中股票既故事令人津津入味之餘亦蘊藏著唔少投資／投機既大道理，遲啲有機會同大家分享多啲。）

由此可以見到，其實每一派都有成功既例子，所以最重要既係搵一個適合你自己既交易模式。一個適合既交易模式會係令你可以持續地、毫不勞力地進行股票交易。無需要刻意限制自己既交易想法。

重點來了，重點是當你決定左成為短炒、中線或長渣交易者之後，你要固守自己的交易模式。

最常會出現問題既情況會係，本身係因為某個別股票有特別利好消息而以短炒為目標買入股票，但及後股票無如預期般高走。係呢種以短炒為目標既話，應該馬上離場。但好多人好多時候會出現唔認錯既心態，努力尋找持貨下去既理由，例如上年業績好勁，大行預期今年會持續增長等等既原因，強化自己繼續持貨既理由。

如此下去，交易模式就會變得混亂。交易係一個持續既行為，而且一個交易會影響下一個交易。做左一個唔好既交易或者無按計劃去進行既交易，會令到之後會越黎越心急，容易出現一啲唔理性既交易。

所以自己既節奏係好重要，如果唔係好易係呢個變幻莫測既股票市場進退失據。你都應該為自己既交易方法落一個定義，然後每次交易前都寫清楚自己交易既原因，同埋係一個咩類型既交易。遲啲會寫一篇文章同大家分享下我認為一個成功交易模式既必要既原素。

你定義自己為一個咩類型既交易者？歡迎係下面分享。